یہ بات شاید عجیب لگے، مگر زمین پر موجود ہر قسم کی زندگی کی بنیاد کاربن ڈائی آکسائیڈ (CO2) ہے۔ یہی وہ گیس ہے جس سے پودے سورج کی روشنی اور پانی کی مدد سے اپنی خوراک بناتے ہیں۔ اس عمل کو ہم ضیائی تالیف (فوٹوسنتھیسِس) کہتے ہیں۔

اس عمل کے نتیجے میں پودے نہ صرف نشونما پاتے ہیں بلکہ فضا میں آکسیجن بھی چھوڑتے ہیں، جس کے سبب انسان اور جانور زندہ ہیں۔ پھر یہی کاربن پودوں سے جانوروں کے جسموں میں جاتا ہے، وہاں سے دوبارہ فضا اور سمندروں میں لوٹ آتا ہے، اور یوں یہ ایک مسلسل چکر میں گردش کرتا رہتا ہے۔ اگر آپ جاننا چاہتے ہیں کہ کاربن سائیکل کسے کہتے ہیں، تو یہ انگریزی مضمون آپ کے لیے مفید ہو سکتا ہے۔

لیکن اس سارے کاربن کا ایک چھوٹا سا حصہ ایسا بھی ہوتا ہے جو اس عام گردش سے نکل کر زمین کی گہرائیوں میں دفن ہو جاتا ہے۔ کبھی یہ چونا پتھر بن جاتا ہے، کبھی کیچڑ اور گارے کی شکل میں کروڑوں سال تک زمین کی تہوں میں سوتا رہتا ہے۔

اگر یہ پودوں کا مادہ زمین میں دفن نہ ہو تو تقریباً ساری آکسیجن جو پودے بناتے ہیں، وہ فوراً ہی جانوروں، فنگس اور بیکٹیریا کے سانس لینے اور جلنے کے عمل میں استعمال ہو جائے۔ مگر چونکہ تھوڑا سا کاربن زمین میں دفن ہو جاتا ہے، اسی کی وجہ سے آج ہماری فضا میں آکسیجن کا اضافی ذخیرہ موجود ہے اور ہم سانس لے سکتے ہیں۔

کاربن ڈائی آکسائیڈ کا دوسرا اہم کردار

اگر کہانی یہیں ختم ہو جاتی تو بھی یہ بات کم دلچسپ نہ ہوتی۔ مگر کاربن ڈائی آکسائیڈ کا ایک اور نہایت اہم کردار بھی ہے۔ یہی گیس زمین کے درجہ حرارت کو قابو میں رکھتی ہے اور سمندروں کی کیمیائی حالت کو بھی متاثر کرتی ہے۔

جب کاربن کا یہ نظام بگڑ جاتا ہے تو زمین کا «تھرموسٹیٹ» (درجہ حرارت کم زیادہ کرنے کا آلہ) خراب ہو جاتا ہے، سمندر تیزابی اور جاندار مرنے لگتے ہیں۔ اسی لیے کاربن ڈائی آکسائیڈ کو کسی عام گیس کے اخراج کی طرح نہیں دیکھا جا سکتا۔

کاربن چکر اور زمین کا نازک توازن

زمین پر کاربن ڈائی آکسائیڈ کی حرکت ایک بہت بڑے اور نازک نظام کے تحت ہوتی ہے جسے ہم کاربن چکر (سائیکل) کہتے ہیں۔ آتش فشاں زمین کے اندر دبی ہوئی کاربن ڈائی آکسائیڈ باہر نکالتے ہیں، جاندار اسے مسلسل جذب کرتے اور چھوڑتے رہتے ہیں، اور ساتھ ہی ساتھ زمین خود بھی اسے واپس چٹانوں میں قید کرتی رہتی ہے۔

پہاڑوں کا کٹاؤ، سمندر میں ننھے ننھے جانداروں کا مر کر زیرِ زمین مل جانا، یہ سب عمل مل کر فضا سے کاربن کم کرتے رہتے ہیں، تاکہ زمین حد سے زیادہ گرم نہ ہو جائے۔ زیادہ تر وقت یہ نظام ایک نازک مگر قائم شدہ توازن کے ساتھ چلتا رہتا ہے۔ دراصل ہم ایک بہت ہی عجیب اور خوش نصیب دنیا میں رہ رہے ہیں، جس کی قدر ہم اکثر نہیں کرتے۔

جب توازن بگڑ گیا: عظیم معدومی کا سبق

لیکن زمین کی تاریخ میں کچھ ایسے لمحے بھی آئے ہیں جب یہ توازن بگڑ گیا۔ کبھی کبھی زمین کا نظام اتنا بگڑ جاتا ہے کہ وہ سنبھل نہیں پاتا۔ ایسے نایاب مگر انتہائی تباہ کن ادوار میں کاربن کا یہ چکر مکمل طور پر بے قابو ہو گیا تھا، اور اس کا نتیجہ ہمیشہ ایک ہی نکلا: بڑے پیمانے پر جانداروں کی ہلاکت، یعنی عظیم معدومی (ماس ایکسٹنکشن)۔

فرض کریں کہ پورے براعظم جتنے بڑے آتش فشاں بھڑک اٹھیں، چونے پتھر کی تہوں کو جلا ڈالیں، زیرِ زمین کوئلے اور گیس کے ذخائر کو آگ لگا دیں اور ہزاروں ارب ٹن کاربن ڈائی آکسائیڈ فضا میں بھر دیں؛ تو کیا ہوگا۔ کچھ ایسا ہی آج سے تقریباً 25 کروڑ 20 لاکھ سال پہلے ہوا تھا، جب زمین کی تاریخ کی سب سے بڑی معدومی (ماس ایکسٹنکشن) آئی۔

اسے پرمیئن دور (تین کروڑ سال پہلے کا دور) کا اختتام کہتے ہیں۔ اس وقت زمین پر موجود تقریباً 90 فیصد جاندار ختم ہو گئے تھے، صرف اس لیے کہ فضا میں کاربن ڈائی آکسائیڈ حد سے زیادہ بڑھ گئی تھی اور کاربن کا نظام بگڑ چکا تھا۔

اس دور میں سائبیریا کے علاقے میں ہزاروں سال تک آتش فشاں پھٹتے رہے۔ سمندر اتنے گرم اور تیزابی ہو گئے کہ ان میں آکسیجن ختم ہونے لگی۔ جگہ جگہ بدبودار، زہریلے کیچڑ جیسے جاندار پھیل گئے۔ ہوا میں خطرناک گیسیں بھر گئیں اور طوفان نہایت شدت اختیار کر گئے۔ مرجان کی چٹانیں (کورل ریفس) ختم ہو چکی تھیں اور زمین کو دوبارہ سنبھلنے میں تقریباً ایک کروڑ سال لگ گئے۔

انسان اور آتش فشاں: ایک خوفناک موازنہ

حقیقت یہ ہے کہ زمین کی تاریخ کے ہر بڑے خاتمے کے پیچھے کاربن کے نظام میں بڑی خرابی نظر آتی ہے۔ چونکہ کاربن ڈائی آکسائیڈ زندگی کے لیے اتنی بنیادی چیز ہے، اس لیے جب ہم اس نظام کو حد سے زیادہ بگاڑ دیتے ہیں تو نتیجہ ہمیشہ تباہی ہی نکلتا ہے۔

اب ایک سوال پیدا ہوتا ہے: اگر انسان بھی وہی کام کرے جو کبھی قدیم آتش فشاں کرتے تھے تو کیا ہوگا؟ اگر ہم بھی زمین کی تہوں میں چھپے ہوئے کوئلے، تیل اور گیس کے وہ ذخائر، جو کروڑوں سال کی زندگی نے جمع کیے تھے، نکال نکال کر جلا دیں؟

فرق صرف یہ ہے کہ آتش فشاں ایک دم سب کچھ اگل دیتے تھے، اور ہم یہ کام آہستہ آہستہ، فیکٹریوں، گاڑیوں اور بجلی گھروں میں انہیں جلا کر کر رہے ہیں۔ مگر رفتار اتنی تیز ہے کہ کئی حسابوں سے یہ پرانی تباہیوں سے بھی زیادہ ہو سکتی ہے۔ یہ وہ سوال ہے جو آج ہم زمین کے سامنے رکھ رہے ہیں۔

آب و ہوا صرف طبیعیات مانتی ہے

آب و ہوا (کلائمیٹ) نہ سیاست کی باتیں سنتی ہے، نہ معیشت کے بہانوں کو مانتی ہے۔ وہ صرف طبیعیات کے اصولوں کے مطابق چلتی ہے۔ اسے اس بات سے کوئی فرق نہیں پڑتا کہ فضا میں اضافی کاربن کسی بڑے آتش فشاں سے آیا ہے یا انسان کی سرگرمیوں سے آیا۔ وجہ کوئی بھی ہو ردِعمل ایک جیسا ہی ہوگا۔ اور ہمیں چٹانوں میں لکھی ہوئی زمین کی تاریخ صاف خبردار کرتی ہے کہ اس کا انجام کیا ہو سکتا ہے۔

اچھی بات یہ ہے کہ ہم ابھی تک ان پرانی تباہیوں جیسی انتہا تک نہیں پہنچے ہیں۔ یہ بھی ممکن ہے کہ آج کی زمین کچھ حد تک زیادہ مضبوط ہو۔ مگر اس کا یہ مطلب نہیں کہ ہم بے فکر ہو جائیں۔

خلاصہ یہ کہ کاربن ڈائی آکسائیڈ نہ صرف زندگی کی بنیاد ہے بلکہ زمین کے توازن کی کنجی بھی ہے۔ یہی ہمیں زندہ رکھتی ہے اور یہی اگر حد سے بڑھ جائے تو سب کچھ ختم بھی کر سکتی ہے۔ سیارہ زمین کی طویل ترین تاریخ ہمیں صاف بتاتی ہے کہ اس نازک توازن کے ساتھ چھیڑ چھاڑ ہمیشہ بہت مہنگی پڑی ہے۔ اب یہ ہم پر ہے کہ ہم اس سبق کو سمجھتے ہیں یا نہیں۔